«Удмурт Кенешлэн» но «Кун Кыл» огинлэн удмурт калыклы вазиськонзы

Гажано удмуртъёс!

Вазиськиськом тӥледлы куронэн: «Удмурт Кенешлэн» удмурт кылэз школаосын одно ик дышетоно предметъёс пӧлы пыртон сярысь ӵектонэзлы дурбасьтыны.

Али асьмелы валче кариськыны туж кулэ.

Калык дась ӧвӧл на

Удмурт азьветлӥсьёс но интеллигентъёс пӧлын та ӵектон шоры оскытэк учкисьёс трос: одӥгъёсыз шуо, калык таӵе вамышлы дась ӧвӧл; мукетъёсыз малпало, та понна луонлыкъёс кылдытэмын ӧвӧл на, куинетӥосыз ӵекто, дышетонлы интые, коньдонэз мукет удмурт проектъёслы висъяны.

Ойдолэ кенешом та пумысен.

Гажано эшъёс! Ку, тӥ малпамъя, общество дась луоз? Общество сярысь вераськыку, кинэ тӥ син азяды пуктӥськоды? Кызьы валалоды, со дась шуыса? Кыӵе ке уж нуиське меда, со дась мед луоз шуыса?

Милям валэктонмы — та юанэз берлолы кельтыны уг яра. Общество ачиз ас понназ уз дасяськы, сое дасяно. Азьланяз дасьгес луэмезлы оскон ӧжыт, угось со понна номыр уг лэсьтӥськы. Со дыр куспын нош удмурт кылын вераськисьёслэн лыдзы ичиёмоз, шаерысьтымы удмуртъёслэн лыдзы но уз йылы — озьыен, асьмеос, туалаеныз но ӵошатыса, эшшо но секытгес югдуре сюром. Соку луонлыкъёс уката ӧжытгес кылёзы.

Обществолэн дась луэмез сярысь вераськыку, кызьы ми валаськом солэсь дась луэмзэ? Кызьы сое адӟеммы луэ? Кылсярысь, али вераммы луэ ни удмурт кылэз курсъёсын дышетыны мылкыд карисьёслэн бадӟым лыдзы сярысь — кылем 5 ар ӵоже лыдпусъёс собыдӟаесь ӧй вал. Удмурт кылъя курсъёсы гожтӥськисьёслэн лыдзы улосчиосмылэсь удмуртэз кулэ каремзэс возьматэ. Курсъёсы гожтӥськемъёс пӧлысь куиньмосэз — соос, кинлэн ас вакытаз потэ вал удмуртэз школаын дышетэмез.

Улосчиосмы пӧлысь тросэз удмурт кылэз школаосын одно ик дышетонлы чутрак пумит уз лу. Чутрак пумит кариськон — юри кышкатон яке провокация. Учконо ке Мордовилэсь опытсэ, кытын мордва кылъёсыз одно ик дышетоно предметъёс пӧлы пыртӥзы 7 ар талэсь азьло, пумитъяськонъёс трос ӧй вал, дыр ортчемъя соос но быризы. Пиналъёс уг тодо на мукет стереотипъёсты.

Куинетӥез, шат кинлэн ке пумитъяськеменыз сэрен кылмес аналтомы но шаерамы тазагес, ӟечгес общество кылдытыны ум тырше? Вань пумитъяськисьёсын луэ но кулэ ужаны, но тодмотэмезлэсь азьвыл ик кышкано ӧвӧл.

Ӧвӧл луонлыкъёс

Куд-ог азьветлӥсьёслэн но удмурт интеллигенцилэн малпамезъя, вань школаосын удмурт кылэз дышетонлы кулэ луись условиос кылдытэмын ӧвӧл. Кылсярысь, тырмыт ӧвӧл кыл дунне — нылпи садын куд-ог кылъёсты дышетэм пиналъёс ӝоген соосты вунэто но азьланяз удмуртэз нокытын но уг куто ни, малы ке шуоно котыразы удмурт сямен вераськисьёс туж ичи. Кыкетӥез, пусъё, удмурт кылэз дышетонын туж шер выль методика кутӥське шуыса, тросэз дышетӥсьёс дышем сямъя ужало. Озьыен, удмурт кылэз дышетэмлэн пайдаез ичи луоз.

Бен, кыл дунне туж кулэ. Сое малпаса азинсконо но условиос кылдытоно, но та уж удмурт кылэз дышетонлэсь нимаз нуиськыны кулэ ӧвӧл. Огез мукетызлы уз люкеты, юрттоз гинэ. Удмурт кылэз школа программае пыртэмен, удмурт кыл кужмоялоз, сое кун кылэз сямен кутон понна эшшо но одӥг муг кылдоз.

Кылэз дышетонъя методикаез, учебникъёсыз кылдытоно но выльдоно. Туэ куарусёнысен удмурт урокъёсты нуыны дышетӥсьёс дась — вань учебникъёс, аудиоурокъёс, ужан тетрадьёс. Удмурт кылэз одно ик дышетоно предметъёс пӧлы пыртон методикаез азинтонлы но выль дышетскон материалъёс кылдытонлы уката ӟеч азинскон сётоз. Мордовилэсь, кылсярысь, опытсэ эскерим ке, адӟом, шаерысь вань школаосын эрзя яке мокша кылъёсыз дышетыны кутскем бере йӧскалык педагогика макем ӝог азинскыны кутскиз. Дышетӥсьёс шаплыгес кариськизы, соос понна ӵемгес нимысьтыз конференциос но семинаръёс ортчылыны ӧдъязы, учебникъёс выльдӥсько, мордва кылын литературалэн тиражъёсыз будо.

Коньдонэз мукет проектъёслы висъяно

Удмурт обществоын трос сэрттымтэ-пертчымтэ лэчыт юанъёс, ваньмыз соос лэчытэсь но висьытӥсесь.

Удмурт кылэз одно дышетоно предметъёс радэ пыртон сярысь ӵектонэз эскерыку, валаны кулэ солэсь статусэзлэсь аспӧртэмлыксэ. Нырысь ик, вераськон мынэ дышетон сярысь законэ воштонъёс пыртон пумысен. Мукет дэмланъёс пӧлысь одӥгезлэн но такем вылӥ статусэз ӧвӧл — одӥгез но соос пӧлысь элькун законодательствое воштонъёс уз пырты, законэз удмуртъёслэн шуг-секытъёссы пала нокызьы уз берыкты. Маин висъясько катэ ӵектон (законодательная инициатива), сое улонэ пыӵатонлы висъям коньдон но элькунысьтымы йӧскалык политика удысын кыӵе ке ужрадэз яке проектэз ортчытон? Катлэн статусэзлэн кужымез — эсэп (норма) луэмез бордын, сое практикаын кутыны луэ. Кыӵе ке эсэп катэ пыртэмын ке, солэсь быдэсъяськемзэ пӧртэм сямен курыны луэ, судэ вазиськыса но. Сыӵе эсэп катын ӧвӧл ке, уд косы. Кылсярысь, Марий Элын вань вывескаосты пор кылэ берыктон сярысь норма кутэмын. Со ӧй ке луысал, асьсэлэсь вывескаоссэс пор кылэ берыктысалзы кӧняез ке гинэ (Ижкарын выллемгес), нош юнматэм норма ваньзылы косэ кык кылын гожтыны. Озьы Йошкар-Олалэн тусыз поргес луиз, нош пор кыл вань юртъёслэн борддоръёсазы адӟиськыны ӧдъяз. Та кыллэсь имиджзэ ӝутыны туж зол юрттэ.

Куд-ог удмурт азьветлӥсьёслэн верамзыя, катъёс улонын адскымон воштӥськонъёс уг ваё. Шуо: Удмурт Элькунын удмуртлэн кун кыл луэмез обществоын но кун ужъюртъёслэн ужазы чик уг шӧдӥськы. Соин валче катэз улонэ пыӵатонэн герӟаськем юан кылдэ — законодательствоысь пункт сяна, кулэ на со пунктэз быдэстонъя уж нуыны. Зэм но, Удмуртиын удмуртэз кун кыл чотын кутонын шуг-секытъёс кылдо ке но, кун кылъёс сярысь катэз но удмурт кыллэсь отын юнматэм статуссэ уг палэнто. Удмурт кыл кун кылэн ӧй лыдъяськысал ке, со эшшо но секытгес югдуре шедьысал — дышетонын но, йӧскалык политикаез быдэстонын но.

Озьы ик валтӥсь юанъёс пӧлы пыртыны кулэ удмуртэз анай кыл чотын дышетонэз. Статистика возьматэ, удмурт кылэз анай кыл радын дышетӥсь школаослэн лыдзы берло 10 ӵоже ог куиньмослы кулэсмиз. Та юан бордын ужано, оло, катэ соя нимысьтыз воштон дасяно. Но со палэнтыны кулэ ӧвӧл шаерамы вань школаосын удмуртэз одно дышетоно предметъёс пӧлы пыртон сярысь юанэз — та кык ӧръёс ог-огзылы уг люкето, юртто гинэ: удмурт кылын вераськон интыослэн лыдзы будэмен, югдур удмурт кылэз тодӥсьёс понна но, тодӥсьтэмъёсыз понна но, удмурт луисьтэмъёс понна но тупатскоз-умоялоз.

Али, «Удмурт Кенешлэн» ӵектонэз Кун Кенешын эскериськыку, асьмелэн одӥг гинэ луонлыкмы вань кылдэм югдурез асьме пала берыктыны. Тодады вае ай, ӵем-а Удмуртиысь парламент удмурт огазеяськонъёслэсь дэмланъёссэс эскере?Али та луонлыкез лэзьыны-ыштыны уг яра, азинтоно сое, солэсь азьланьзэ рос-прос син азяды пуктэмды уг но луы ке.

Гажано эшъёс, ӧтиськом тӥледыз та ӵектон котыр валче кариськыны но сое улонэ пыӵатон понна вань кужымдэс, кынардэс, ӟигардэс, моӵтэс поныны. Макем тросгес куспамы валантэмъёс, керетонъёс, сокем шумпото пумитъяськисьёс. Макем ӧжыт куронъёсмы, сокем пичи азинсконъёсмы луозы. Удмурт кылэз факультатив амалэн гинэ дышетыны курим ке, малпанмес ваньмыз санэ уз понэ.

Асьмеос, статус, арлыд, огазеяськонъёсы пыриськон но мукетыз шоры учкытэк, кужыммес огазеяны кулэ. Али асьмелэн луонлыкмы вань. Со борды ӝабырскимы ке, анай кылмылы юрттом, азинтом, келямы ке — арысь аре лябӟом.

Добавить комментарий

Ваш e-mail не будет опубликован. Обязательные поля помечены *